يوتيوبر روسي مشهور اسمه "ميخائيل ليتفين" اشترى عربية مرسيدس gt 63 قيمتها تقريبا 170 ألف دولار يعنى حوالي 2 مليون و 700 ألف جنيه مصري
الأستاذ ليتفين العربية كانت كل شوية الموتور بتاعها بيحصل فيه مشكلة، ولما بيروح التوكيل بيحلوا المشكلة وبترجع تانى، وعلى حد قوله إن معاملتهم مكنش فيها حرص على إصلاح العطل، عشان كده المشكلة كانت بتتكرر بإستمرار.
بعت للشركة الأم في ألمانيا عشان يقولهم على المشكلة ويقدموا له حل جذري للمشكلة، لكن محدش رد عليه.
الراجل اضايق وزهق من العربية وجاب آخره، راح عمل ايه؟
راح مولع في العربية وخلاها عبارة عن كتلة من الفحم، وقام بتصوير الفيديو كامل ورفعه على اليوتيوب وفي نهاية الفيديو ركب عربية قديمة جدا ومدرتش وجاب الناس تزقه عشان العربية تدور، في إشارة منه إن العربيتين زي بعض مفيش فرق الفيديو حقق لحد الآن أكتر من 13 مليون مشاهدة
طبعا الراجل بقى حديث السوشيال ميديا والمواقع والصفحات، وطبعا عداد ادسنس شغال بيعد فلوس وشركات العربيات العالمية متوقع هتديله عربية ببلاش عشان الناس كلها مستنية يا ترى هيجيب ايه غير مرسيدس وهتبقى أحلى دعايا للشركة نفسها.
الراجل في الحقيقة مخسرش عربية، هو كسب كتير ويكفي الدعايا اللي عملها لنفسه ولقناته وفلوس الاعلانات اللي هتنهال عليه وعروض الشركات اللي مش هتنتهي
