اخبار كريبتو

أشهر ٣ أنظمة للشاشات السمارت android - tizen - web os وما افضلهم

 


هنتعرف النهاردة علي اشهر 3 انظمة للشاشات السمارات . دعنا نتعرف علي افضل نظام تشغيل لشاشات . سنتحدث اليوم Android Tv الرسمي والغير رسمي وكذلك Tizen OS و Web OS ان شاء الله سوف نتحدث عن كل نظام بالتفصيب وايه اهم مميزاته . 

ما هو نظام Android TV الرسمي للشاشات 

هو الأكثر انتشاراً في مصر أن لم يكن في العالم كله .. لإنه بينزل على كل شاشات العربي جروب ( سوني ، توشيبا ، تورنيدو ، شارب ) وكان معاهم TCL قبل ما تبقى مع وكيل يونيون إير .. وكمان بينزل على شاشات من Synix و Contex وغيرهم. النظام ده أسهل نظام ممكن تتعامل معاه .. بسيط جداً ومألوف كأنك بتتحكم في موبايلك الاندرويد .. واجهة بسيطة تقدر تشقلبها وتعدل فيها براحتك .. ميزة التطبيقات الغير رسمية والرسمية  اللي تقدر تنزلها  ولكن بتكلم في نقطة سهولة تنزيل أي تطبيق سواء رسمي أو لاء. وكمان عندك مجموعة واسعة من الMedia players زي VLC و MX Player .. حيب إنت بتحب تستخدم إيه كمان ميزة مساعد جوجل الصوتي اللي حرفيا لو كلمته بالمصري هيفهمك ويجيبلك اللي إنت عايزه (بس خلي بالك سرعة الشاشة والمعالج وكوالتي المايك المستخدم في الريموت بتفرق) ده كان نظام اندرويد تي في في الشاشات 

نظام الاندرويد غير الرسمي ..
 برضو بينزل على بعض مويدلات Contex و HOHO وشركات تانية كتير .. بيفرق عن الرسمي إنه مفيهوش خدمات جوجل أو يلاي ستور بشكل رسمي إنما بتعديل .. حاجة زي نظام هواوي مع خدمات جوجل. إنما برضو تقدر تنزله أي تطبيق سواء رسمي أو لاء .. عيوبه إن الواجهة شكلها اسوأ من الرسمي + مفيهوش مساعد صوتي لحد دلوقتي. ف رأيي لو هتجيب شاشة بنظام أندرويد خليك في الرسمي إلا لو فلوسك ما تسمحش وبرضو النظام هيكون مناسب ومش هيضايقك. عيوب بقا نظام الأندرويد بشكل عام بالنسبالي (وده مش عيب فعلي يعني) .. إنه نظام مفتوح المصدر .. يعني حرفياً إنت مش هتكون بتمتلك حاجة مميزة .. يعني أي حد يقدر ينزل النظام ده ويحرقه على فلاشة ويحطه على لاب توب قديم عنده ويوصله بالشاشة ويبقى عنده Android tv 

ما هو نظام Tizen للشاشات 

وده موجود على شاشات سامسونج وهختص الكلام على اخر نسخة من النظام وهي Tizen 6 اللي موجود من أول 2021 نظام شكله شيك واجهة خفيفة مش تقيلة بس تحسه فاضي كدة .. طب وبعدين يعني مفيش أي أكشن في السوفت وير ولا أي انبهارات ولا إضافات؟ .. لا مفيش هي تطبيقاتك وخانات الTrending وشكراً.. ف هو نظام عملي ومنظم كدة أكتر من كونه نظام مبهر يعني. طب المساعد الصوتي اللي اسمه Bixby؟ .. عشان تستخدمه كويس حرفيا لازم تبقى بتتكلم إنجليزي بطلاقة شديدة عشان ما يضايقكش .. لإنه حتى مش بيدعم اللغة العربية .. ومش هيفيدك لو بتتكلم انجليزي من بتاعنا العادي ده  ( النظام ده برة مصر في دول معينة بيدعم إنك تختار بنفسك مساعد صوتي مختلف عن بتاع سامسونج بين جوجل أسيستانت وأمازون إليكسا .. معرفش هل في وقت ما هينزل تحديث لشاشات مصر يسمح بده ولا لاء) فيه عيب كمان بالنسبالي هكتبه مع عيب النظام التالت

نظام Web Os للشاشات 

 وده موجود في شاشات LG .. وبرضو هتكلم عن الإصدار 6 لسنة 2021 منه بالنسبالي .. ده الأفضل مع بعد النواقص البسيطة .. أو تمنيات يعني أشيك سوفت وير و أشيك واجهة .. ريموت ماچيك مع الواجهة دي يخليك حرفياً مستمتع بالشاشة والريموت وشكل الماوس .. تحسه أندرويد على لينكس على mac os كدة مع بعض توليفة غريبة لكن لذيذة المساعد الصوتي؟ .. لطيف .. أقل من جوجل أسيستانت لكن أحسن من مساعد سامسونج بفرق كبير بيدعم العربي والمصري كمان .. مشكلته بس في صوت المساعد نفسه حتى وهي بتتكلم انجليزي بتحس انك بتكلم روبوت كدة. وكذلك الريموت فيه زرار لجوجل أسيستانت وامازن أليكسا ولكن لسة مش متاح في مصر إنك تستخدمهم ومش عارف هل هيتم تشغيلهم في مصر ولا لاء .. أعتقد دي حاجة ليها علاقة بتنظيم الاتصالات وكدة. فيه مميزات تانية لطيفة كدة زي انك تختار فريقك المفضل ولو بيلعب ماتش وانت بتتفرج على حاجة تانية هيطلعلك تنبيه وقت ما فريقك يسجل جون وبجد ميزة الريموت الماچيك اللي فيه ماوس دي عظيمة وتخلي النظام ده يكتسح بسهولة رغم إنه أتقل قليلاً كواجهة وتنقل من سامسونج. مشكلة النظام ده او نظام سامسونج معايا إنك مجبر تستخدم البرامج الرسمية فقط .. مجبر على الميديا بلاير الأساسي حتى لو مش عاجبك .

التوليفة بين نظامين: لو حد ميزانيته تسمح ممكن يجيب Web OS أو حتى Tizen وبعدين يجيب Mi box من شاومي بيشتغل بنظام أندرويد تي في ويبقى كدة معاه نظامين مش بس واحد على نفس الشاشة. 

في النهاية تعرفنا علي اشهر و افضل انظمة التشغيل لشاشات Android Tv الرسمي والغير رسمي وكذلك Tizen OS و Web OS . ف اختر انت ما يعجبك منهم 
تعليقات



حجم الخط
+
16
-
تباعد السطور
+
2
-